Ökumaður jepplings var fluttur á slysadeild Landspítalans í Fossvogi eftir bílveltu á Suðurlandsvegi í Svínahrauni nálægt afleggjaranum að Hellisheiðarvirkjun um klukkan hálfþrjú í dag.
Talsvert viðbragð var vegna slyssins þar sem í upphafi var umfang þess ekki alveg ljóst. Sjúkrabifreiðar frá Heilbrigðisstofnun Suðurlands, lögreglan á Suðurlandi auk slökkviliðsmanna Brunavarna Árnessýslu frá Hveragerði fóru á vettvang. Það vildi svo til að sjúkrabifreið frá Slökkviliði höfuðborgarsvæðisins átti leið um svæðið á sama tíma og gátu þeir því rétt fram hjálparhönd á vettvangi.
Ökumaðurinn var einn á ferð og er ekki vitað með líðan hans að svo stöddu.
Bifreiðin er gjörónýt.