Einhliða yfirlýsingu um eignarhald á Dyrhólaey mótmælt

Í fjölmiðlum undanfarna daga hefur komið fram að Mýrdalshreppur og nokkrir aðrir eigendur jarða í austurhluta Dyrhólahverfis í Mýrdal (svonefndra Austurhúsajarða) hafi látið þinglýsa yfirlýsingu um að þeir einir séu eigendur Dyrhólaeyjar.

Eigendur jarða í vesturhluta Dyrhólahverfis (svonefndra Vesturhúsajarða) telja með þessu gróflega á sér brotið og líta svo á að þinglýsing á einhliða eignayfirlýsingu hafi verið óheimil.

Í tilkynningu sem eigendur Vesturhúsajarða hafa sent frá sér kemur fram að þeir muni höfða mál gegn sveitarfélaginu og öðrum landeigendum Austurhúsajarða til að fá viðurkenndan helmingseignarrétt sinn í Dyrhólaey, eins og verið hefur um aldaraðir.

„Engar breytingar hafa orðið á eignarhaldi Dyrhólaeyjar frá því er elstu heimildir greina um. Dyrhólaey hefur frá örófi alda verið óskipt sameignarland allra jarðanna í Dyrhólahverfi og ábúendur þeirra hafa sameiginlega annast umhirðu og verndun eynnar. Einhliða eignayfirlýsing eigenda Austurhúsajarða er tilraun til sjálftöku sem eigendur Vesturhúsa munu ekki una,“ segir í tilkynningunni frá eigendum og ábúendum á Vesturhúsajörðum í Dyrhólahverfi.