Í tilefni Alþjóðlega endurlífgunardagsins í dag, 16. október, eru eigendur og umsjónaraðilar hjartastuðtækja hvattir til að skrá tækin sín í nýja kortasjá hjartastuðtækja. Markmiðið er að auðvelda almenningi og Neyðarlínunni að finna hjartastuðtæki þegar hjartastopp verður en hver mínúta getur skipt sköpum.
Heilbrigðisráðuneytið í samstarfi við fjölda aðila stendur fyrir skráningu hjartastuðtækja á landsvísu. Með verkefninu verður til heildstæð kortasjá yfir hjartastuðtæki á Íslandi þar sem upplýsingar um staðsetningu og aðgengi að tækjunum verða aðgengilegar þegar á reynir.
Hjartastuðtæki er að finna víða um land, meðal annars á vinnustöðum, íþróttamannvirkjum, skólum og öðrum opinberum byggingum.
Einfalt að skrá hjartastuðtæki
Skráningarferlið er einfalt og tekur aðeins nokkrar mínútur. Eigendur og umsjónaraðilar hjartastuðtækja geta jafnframt valið hvort upplýsingar um staðsetningu tækisins verði sýnilegar almenningi eða eingöngu aðgengilegar Neyðarlínunni.
„Hjartastuðtæki geta bjargað lífum, en aðeins ef þau finnast þegar á reynir. Þess vegna skiptir máli að sem flest tæki verði skráð í kortasjána. Ég hvet því alla eigendur og umsjónaraðila hjartastuðtækja til að taka nokkrar mínútur frá og skrá tækin sín. Sú skráning getur skipt sköpum,“ segir Alma D. Möller heilbrigðisráðherra.
Það tekur aðeins örfáar mínútur að skrá hjartastuðtæki. Þegar hjartastopp verður getur sú skráning skipt sköpum.
- Skráðu tækið hér: Kortlagning sjálfvirkra hjartastuðtækja