Kjartan Björnsson, rakari á Selfossi og þekktasti Arsenalmaður landsins var klæddur í Liverpool-búning nú í morgun eftir að hafa tekið áskorun í góðgerðarviku Nemendafélags Fjölbrautaskóla Suðurlands.
Í góðgerðarvikunni hafa nemendur FSu skorað á hvert annað, kennara og starfsfólk skólans með það að markmiði að safna fé fyrir Börn með krabbamein. Nemendafélagið skoraði á Kjartan að klæðast Liverpool-treyju þegar söfnunin myndi ná 520.000 krónum.
Söfnunarmarkmiðið náðist í morgun og fékk æskuvinur Kjartans, Halldór Morthens málari á Selfossi og mikill Liverpool-maður, þann heiður að klæða vin sinn í Liverpool-treyjuna. Kjartan verður í treyjunni í vinnunni í dag.
„Þetta er mjög skrítin tilfinning. Ég ætlaði mér aldrei að gera þetta, ekki í þessu lífi en ég geri þetta fyrir málsstaðinn, Börn með krabbamein, það bara snertir mig mjög mikið. Ég þekki til nokkurra fjölskyldna sem eru í þeim erfiðu aðstæðum, það er punkturinn í þessu máli. En svo er auðvitað gaman að hjálpa krökkunum í FSu, þetta er frábært hjá þeim að safna fyrir góðan málstað,“ segir Kjartan í samtali við sunnlenska.is.
Margir Arsenalmenn mjög reiðir
„Svo að þetta ævintýri að fara í þennan andskotans Liverpool-búning, það er náttúrulega sér kapítuli og ég geri það eins og ég segi bara fyrir málstaðinn. Ég geri það ekki einu sinni fyrir Halldór Morthens, æskuvin minn. Þetta er ekkert mjög þægilegt en ég þarf víst að venjast þessu næstu sjö klukktímana, það er niðurstaðan, í fyrsta sinn og eina og ég bið alla Arsenalmenn um allan heim innilegar afsökunar á því að hafa gert þetta. Þeir eru mjög margir reiðir.“
„Ég stofnaði Arsenal-klúbbinn á Íslandi 15. október 1982, með Hilmar Hólmgeirssyni vini mínum og bílasala. Klúbburinn átti einmitt afmæli í gær. Þetta fór illa í mína félaga um allt land og þeir buðust til að borga upphæðina og vel það til að slá þessa vitleysu út af borðinu og bjarga mér út úr vandræðunum. Það hringdu í mig menn í gær sem ætluðu að draga mig að landi en ég vissi ekki hvort það væri leyfilegt í þessari keppni. Ég var með Arsenal-klúbbinn í 20 ár, þess vegna þekki ég Arsenal-menn um allt land. Nú þarf ég að sætta mig við þetta í einn dag.“
„Ég mun fara úr búningnum á mínútunni klukkan fimm í dag og svo fer ég beint í sturtu. Ég ætla að þvo mér hátt og lágt með sápu og setja svo einhverja góða lykt á mig.“
Vonar að fólk gleymi uppátækinu
Kjartan segir að hann hafi þurft að hugsa sig svolítið um þegar hann fékk þessa áskorun. „Það kom svolítið á mig þegar það komu þessir ungu menn úr fjölbrautaskólanum og skoruðu á mig. En um leið og þeir nefndu málstaðinn þá fór ég að tvístíga. Það tvístig stendur enn en núna er ég búin að klára málið þannig að ég get ekki bakkað út úr þessu.“
„Ég óska krökkunum í Fjölbrautaskóla Suðurlands til hamingju með að ná þessu takmarki og ég vona að allir verði búnir að gleyma þessu á morgun, að ég hafi verið í þessum skrítna búningi hérna. Mér líður ekkert vel í honum.“
Halldór, sem getur ekki hætt að brosa eftir vinur hans fór í búninginn efast þó að Kjartani verði að ósk sinni. „Það er ekki séns að fólk gleymi þessu en þetta er rosalega gaman að fá að sjá hann í treyjunni. Svo er eitt annað, stytting vinnuvikunnar á ekki við í dag þannig að þú ert í treyjunni til sjö,“ segir Halldór og þeir vinirnir hlæja báðir dátt.
Þess má geta að You Never Walk Alone fékk að óma á rakarastofunni á meðan Kjartan fór í búninginn og er það sennilega í eina skiptið sem þessi þjóðsöngur Liverpool-manna hefur fengið að hljóma þar.
