Sunnlenska.is, fréttavefur Sunnlendinga, er kominn á grunnskólaaldurinn. Vefurinn fagnar sex ára afmæli í dag en hann fór í loftið þann 8. apríl 2010.
Vefurinn fékk frábærar viðtökur strax í upphafi og er umferð um hann ennþá að aukast jafnt og þétt. Í dag er svo komið að hann er mest lesni héraðsfréttamiðillinn á Suðurlandi.
Vefurinn er heimsóttur úr öllum heimshornum og á fjölmarga fasta lesendur erlendis t.d. um alla Skandinavíu, í Bandaríkjunum, Þýskalandi og á Spáni, en einnig koma reglulegar heimsóknir frá fjarlægari heimshornum eins og Súdan, Tælandi, Sameinuðu arabísku furstadæmunum og Filippseyjum.
Allt frá því vefurinn fór í loftið hefur ritstjórn hans kappkostað að flytja fréttir af öllu Suðurlandi auk þess að fjalla um menningarmál og íþróttir í héraðinu.
Ritstjórn sunnlenska.is þakkar lesendum sínum fyrir skemmtilega og jákvæða samveru á liðnum árum og horfir björtum augum fram á veginn.