Vegagerðin reiknar með að hægt verði að hefjast handa við dýpkun í Landeyjahöfn í dag en útlit er fyrir minni ölduhæð næstu daga. Frekar grunnt er í innsiglingunni og hugsanlegt að það gæti haft áhrif á siglingar ef ölduhæð er mjög mikil.
Dýpkunarskipið Álfsnes er á leiðinni frá Ísafirði og er reiknað með að það verði komið til Landeyjahafnar í dag.
Fyrir helgi var dýpið komið niður í u.þ.b. 4 m í hafnarmynninu, innan hafnar er einnig grunnt við innri Eysti-garðinn. Dæla þarf um 30 þúsund rúmmetrum úr hafnarmynninu og um 40 þúsund innan hafnar og er reiknað með að það taki 7-10 daga en framvindan fer eftir veðri.