Dýpkunarframkvæmdir ganga vonum framar

Kostnaður við hafnarframkvæmdir í Þorlákshöfn gæti orðið fjórðungi minni en áætlun gerir ráð fyrir. Við dýpkun hafnarinnar hefur komið í ljós að þar er meira af lausu efni, og minna af bergi en talið var.

„Við gætum sparað hálfan milljarð króna miðað við kostnaðaráætlun, verkið gengur miklu betur en áætlað var“, segir Hjörtur Bergmann Jónsson hafnarstjóri í Þorlákshöfn í samtali við RÚV.

Á næsta ári átti að sprengja gömlu Norðurvararbryggjuna og berg á botninum, en nú gæti svo farið að aðeins þurfi að sprengja bryggjuna. Reiknað var með að framkvæmdirnar í ár og á næsta ári kostuðu 900 milljónir. Á árunum 2017 og 2018 verður svo skipt um stálþil í höfninni svo viðhalda megi dýpt hennar. Kostnaðaráætlun alls verksins nemur 2 milljörðum króna.

„Við lögðum áherslu á að fá pramma með stórvirkri gröfu til að grafa upp úr höfninni, fremur en að dæla upp úr henni og það hefur virkað vel. Framkvæmdirnar á næsta ári munu aðeins kosta hluta af því sem áætlað var“, segir Hjörtur. Bæjarstjórn Ölfuss samþykkti á dögunum viðauka við fjárhagsáætlun hafnarinnar á þessu ári, þar sem framlag til framkvæmdarinnar er aukið um 50 milljónir króna. Um leið lækki framlag á næsta ári, enda kostnaður á rúmmetra við sprengivinnu meira en fimmfaldur, miðað við moksturinn. Bæjarsjóður greiðir 40% af hafnarframkvæmdum, ríkissjóður 60%.

Frétt RÚV