Þrír nemendur við Fjölbrautaskóla Suðurlands eyddu heilum sólarhring á Olís á Selfossi. Dvölin var liður í góðgerðarviku NFSu þar sem nemendur skoruðu á hvert annað með það markmið að safna fé fyrir styrktarfélagið Börn með krabbamein.
Áskorunin hófst klukkan 13:45 í gær, föstudag og stóð til klukkan 13:45 í dag, laugardag.
Björgvin Gunnar Héðinsson skoraði á sjálfan sig að dvelja í 24 klukkustundir á Olís. „Bróðir minn var einu sinni með einhverja svona keppni með vinum sínum og þess vegna datt mér þetta í hug. Þetta er ekki jafn góð hugmynd þegar ég hugsa um þetta núna, eins og þegar mér datt þetta í hug. En þetta var bara fínt,“ segir Björgvin, mjög þreyttur í samtali við sunnlenska.is, þegar vistinni á Olís var alveg að ljúka.
Heim að horfa á Liverpool-leik
Björgvin dvaldi á Olís ásamt þeim Benedikt Hrafni Guðmundssyni og Nóa Jóhannessyni í heilan sólarhring. Fleiri nemendur FSu komu við hjá þeim og stoppuðu í lengri eða skemmri tíma til að veita þeim félagsskap. Mest voru átján nemendur á Olís á sama tíma og skapaðist mikil stemning. Starfsfólk Olís var þó ekkert nema almennilegheitin.
„Ég er mjög þreyttur. Ég svaf í mesta lagi klukkutíma,“ segir Björgvin en Benedikt og Nói náðu aðeins meiri svefni. Björgvin ætlar þó ekki að fara beint að sofa þegar hann kemur heim. „Ég ætla að horfa á Liverpool-leikinn, síðan sofa.“
Drengjunum leiddist ekki á þessum sólarhring sem þeir dvöldu á bensínstöðinni. „Við erum búin að vera spila, spjalla, live-streama á TikTok. Erum búnir að tefla heila skák og svo vorum við svolítið að spila Olsen Olsen í morgun.“
Björgvin sér þó ekki eftir því að hafa tekið áskoruninni frá sjálfum sér. „Þetta var fyrir Börn með krabbamein. Ég mun samt ekki gera þetta aftur og það verður langt þar til ég fer aftur á Olís.“
Góðgerðarviku NFSu lauk í gær, föstudag. Nemendur skólans söfnuðu tæpri milljón fyrir Börn með krabbamein með hinum ýmsu áskorunum.
