Deilt um staðsetningu embættis

Sveitarstjórn Bláskógabyggðar hefur samþykkt að stækka aðstöðu embættis skipulags- og byggingarfulltrúa uppsveita Árnessýslu og Flóahrepps og úthluta embættinu alla efri hæð húsnæðisins að Dalbraut 12 á Laugarvatni þar sem það er nú þegar staðsett.

Ekki er einhugur um þessar málalyktir á meðal þeirra sveitarstjórna sem standa að embættinu því Grímsnes- og Grafningshreppur hefur ítrekað fyrra tilboð sitt um að starfsemi embættisins flytjist í nýtt stjórnsýslu- og skólahúsnæði sem verið er að reisa á Borg.

Heilsugæslan hefur haft aðstöðu í húsnæðinu að Dalbraut 12 með embættinu en Valtýr Valtýsson, sveitarstjóri Bláskógabyggðar, segir að fundið verði annað húsnæði undir starfsemina á Laugarvatni í samráði við heilsugæsluna.

Embætti skipulags- og byggingarfulltrúa fær nýju aðstöðuna til afnota frá og með 1. júlí eftir að nauðsynlegar breytingar hafa verið unnar á henni.

Fram til þessa hefur ítrekað verið reynt að fá aðstöðu fyrir skipulags- og byggingarfulltrúaembættið leigða í húsnæði Héraðsskólans sem er í eigu ríkisins og sem hefur staðið auður um árabil en þær viðræður hafa ekki skilað ásættanlegum árangri að mati sveitarstjórnar og hefur þeim verið slitið.