Um fimmtán metra langt búrhvalshræ fannst í Bakkafjöru, skammt vestan við Landeyjahöfn, í síðustu viku. Mikinn óþef leggur frá hræinu sem hefur líklega velkst lengi í sjónum áður en það rak á land.
Nærri hræinu eru vatns- og rafmagnslagnir sem liggja til Vestmannaeyja. Í Fréttablaðinu í dag kemur fram að starfsmenn röraverksmiðjunnar Set hafi mátt þola nokkur óþægindi vegna óþefsins við störf sín í tengslum við lagnirnar.
Ekki hefur verið tekin ákvörðun um hvað skuli gert við hvalshræið en samkvæmt Fréttablaðinu er málið á borði Heilbrigðiseftirlits Suðurlands.