Síðastliðinn föstudag, á alþjóðlegum baráttudegi kvenna, tóku nemendur Menntaskólans við Laugarvatn sig saman og dönsuðu gegn ofbeldi.
Boðað var til dansviðburðar í miðrými ML undir forystu jafnréttis- og skólaráðsfulltrúa, Ingunnar Lilju Arnórsdóttur og Rakelar Díu Arnarsdóttur. Um árlega hefð er að ræða þar sem góður dagur er valinn og nemendur skólans dansa gegn ofbeldi.
![](https://www.sunnlenska.is/wp-content/uploads/2024/03/dans1-1024x768.jpeg)
Stallari og varastallari, Kolfinna Sjöfn Ómarsdóttir og Eydís Lilja Einarsdóttir, héldu stutta ræðu þar sem þær hörmuðu ófriðarástand í heiminum í dag. Margrét Elín Ólafsdóttir stýrði dansinum og gleðin tók völd eins og meðfylgjandi myndir sýna vel.
![](https://www.sunnlenska.is/wp-content/uploads/2024/03/dans3-1024x768.jpeg)
Það vildi svo skemmtilega til að liðsmenn Vinstri grænna voru staddir í kynningarheimsókn í skólann og ef vel er að gáð má sjá liðsmenn þeirra spreyta sig á dansinum.
Menntaskólinn mælir almennt með dansi gegn ofbeldi því góður og hressilegur dans eykur gleði og ýtir undir kærleika. Svo er hann líka góð hreyfing.
![](https://www.sunnlenska.is/wp-content/uploads/2024/03/IMG_8170-1024x768.jpeg)