Slagsmál brutust út við skemmtistaðinn Hvíta húsið á Selfossi aðfaranótt sunnudags. Ekki liggur fyrir hver aðdragandi þeirra var.
Slagsmálunum lauk með því að tveir hlutu blóðnasir og einn var fluttur á heilsugæsluna á Selfossi þar sem hann hafði farið úr axlalið. Í átökunum datt einn á bíl með þeim afleiðingu að bíllinn dældaðist lítils háttar.
Í dagbók lögreglunnar kemur fram að hún hafi haft í mörg horn að líta í liðinni viku. Þrátt fyrir mikla umferð urðu einungis þrjú minniháttar umferðaróhöpp og þrír voru kærðir fyrir hraðakstur. Stór rúða var brotin í skólavistuninni Bifröst á Selfoss um miðja síðustu viku og um helgina var brotist inn í sumarbústað í Vallarholti við Laugarvatn. Þaðan var stolið rafmagnsverkfærum. Af ummerkjum að dæma eru líkur til að þjófurinn hafi ætlað að taka með sér helluborð en hætt við.