Mikill erill var hjá lögreglumönnum á Selfossi um helgina þar sem þurfti að sinna alls konar verkefnum. Þar má nefna bílveltu í Kömbum á laugardag og nauðlendingu flugvélar á Biskupstungnabraut á milli Geysis og Gullfoss.
Kona handarbrotnaði er hún datt af vélsleða á Langjökli við Skálpanes. Hún var flutt með sjúkrabifreið á Slysadeild Landspítala.
Karlmaður hlaut opið fingurbrot þegar hann féll af vélhjóli á vegi skammt við Skíðaskálann í Hveradölum og þrettán ára drengur slasaðist við fall á torfæruhjóli á mótorkrossbrautinni á Bolöldu. Meiðsli hans munu hafa verið minni háttar.
Tíu ökumenn voru kærðir fyrir hraðakstur í vikunni, tveir fyrir ölvunarakstur og einn fyrir akstur undir áhrifum fíkniefna.