Ökumaður sem lögreglan á Suðurlandi stöðvaði við útsýnispall í Eldhrauni á fimmtudag í síðustu viku reyndist undir áhrifum kannabis.
Honum var gert að hætta akstri og fær mál hans venjubundna meðferð í kjölfarið.
Þetta kemur fram í dagbók lögreglunnar á Suðurlandi.
Eitt umferðarslys er fært til bókar í dagbókinni; á föstudag valt bifreið útaf vegi í hálku á mótum Suðurlandsvegar og Hoffellsvegar. Ökumaður var einn í bílnum og slapp lítið meiddur.
Fjórtán stór ökutæki voru skoðuð í vegaskoðun þar sem ein athugasemd var gerð vegna aurhlífa og ljósabúnaðar. Þá eru ellefu verkefni í dagbók lögreglunnar sem tengjast COVID-19. Þar er um að ræða eftirlitsferðir á veitinga- og gististaði og flutning sýna til rannsóknar.