Dagbók lögreglu: Hraðakstursbrotum fækkar

Lögreglan á Suðurlandi kærði 35 ökumenn fyrir hraðakstur í síðustu viku. Hraðakstursbrotum hefur fækkað frá því sem verið hefur í sumar.

Í dagbók lögreglunnar segir að skýringin geti legið í því að umferð er orðinn minni og hitt að lögreglumenn hafi verið að sinna skylduverkefnum á kostnað frumkvæðisverkefna. Mikið álag hefur verið á lögregluliðinu á Suðurlandi í síðustu viku vegna tveggja banaslysa og annarra verkefna komið hafa upp í tengslum við ferðamenn sem hafa slasast, týnst á fjöllum, ekið utan vegar og svo framvegis.

Lögreglan á Suðurlandi kærði erlendan ferðamann fyrir utanvegaakstur í Landmannalaugum í síðustu viku. Honum var gert að greiða 100 þúsund krónur í sekt.

Lögreglunni á Höfn bárust tvær tilkynningar um utanvegaakstur við Fjalljökul. Ekki náðist í þá ökumenn sem þar voru að verki.

Lögreglunni var tilkynnt um slys á ellefu einstaklingum í vikunni þar sem fólk beinbrotnaði vegna falls eða hlaut minni háttar áverka af ýmsum ástæðum.

Einn var kærður fyrir ölvunarakstur og annar fyrir að aka bifhjóli sviptur ökuréttindum.

Átta minni háttar þjófnaðarmál voru kærð til lögreglu, flest á Selfossi sex talsins.