Dagbók lögreglu: Féll fram af húsþaki

Maður féll af þaki íbúðarhúss á Selfossi í liðinni viku. Tveir menn voru við vinnu á þakinu og voru á leið niður þegar annar þeirra rann til.

Hinn ætlaði að koma honum til hjálpar en rann þá sjálfur fram af þakbrúninni. Fallið var um þrír metrar. Maðurinn kenndi til í baki og var fluttur með sjúkrabifreið á heilsugæsluna á Selfossi til aðhlynningar.

Um hádegi á laugardag varð slys skammt frá Sólheimakoti í Mýrdalshreppi er tvær erlendar konur veltu snjósleða. Þær voru fluttar til læknis en munu ekki hafa slasast. Þó hlaut önnur þeirra skerta meðvitund en jafnaði sig af því.

Í dagbók lögreglunnar á Suðurlandi kemur fram að sjö ökumenn voru kærðir fyrir hraðakstur í vikunni. Sex þeirra voru erlendir ferðamenn á leið um Rangárvalla- og Skaftafellssýslu.

Þrír voru kærðir fyrir akstur undir áhrifum fíkniefna, einn fyrir ölvunarakstur, einn fyrir akstur sviptur ökuréttindum og einn fyrir að hafa ekið án þess að hafa endurnýjað ökuréttindi sín.