Þrettán ökumenn voru kærðir fyrir að aka of hratt í umdæmi lögreglunnar á Selfossi í liðinni viku.
Hraðast ók maður á sextugsaldri á Hellisheiði 139 km/klst þar sem leyfður hámarkshraði er 90 km/klst og verður hann vart talinn til góðrar fyrirmyndar sér yngri ökumönnum í umferðinni, segir í dagbók lögreglunnar.
Sjö umferðaróhöpp voru tilkynnt til lögreglu öll án teljandi slysa. Einn ökumanna úr þessum óhöppum svaf úr sér áfengisvímu í klefa lögreglu í nótt en bifreið hans lenti út af Þingvallavegi við Kjósaskarð. Hann var látinn laus undir hádegi í dag eftir yfirheyrslu.
Einn ökumaður var kærður fyrir að aka undir áhrifum ávana og fíkniefna en í þvagi hans greindist THC, sem kemur fram eftir kannabisneyslu.
Blóðsýni hefur verið sent rannsóknarstofu Háskólans til greiningar og hlýtur málið framgang eftir þeim niðurstöðum sem þaðan fást.