Dagbók lögreglu: Brotist inn í sjö sumarhús

Um helgina var tilkynnt innbrot í sex sumarbústaði við Fljótsbakka sem er við Úlfljótsvatn á milli Steingrímsstöðvar og Ljósafossvirkjunar í Grímsnesi.

Líkur eru á að innbrotin hafi átt sér stað á tímabilinu frá því síðastliðinn fimmtudag til laugardags. Þjófarnir höfðu á brott ýmiss konar rafmagnstæki svo sem sjónvörp, DVD spilara og uppþvottavél.

Einnig var tilkynnt um innbrot í bústað við Hraunhvarf í landi Klausturhóla í Grímsnesi.

Lögreglan biðlar til þeirra sem veitt geta upplýsingar um þessi innbrot að hafa samband í síma 480 1010.

Á laugardag var tilkynnt um þjófnað á jeppabifreið sem hafði staðið við íbúðarhús á Selfossi viku áður. Eigandi bifreiðarinnar hafði grun um hver hefði tekið bifreiðina. Sá vísaði á hana í Reykjavík þar sem hún fannst óskemmd.

Tvö minni háttar fíkniefnamál komu upp í vikunni sem varða vörslu og neyslu. Málin eru í rannsókn þar sem beðið er niðurstöðu efnarannsóknar.

Lögreglumenn á Selfossi sinntu yfir 130 verkefnum í liðinni viku. Þar á meðal var fjöldi birtinga vegna ákæra, dóma og sektarboða. Einnig eru fjölmörg verkefni sem snúa að því að veita borgaranum þjónustu af ólíklegasta tagi.