Nýr meirihluti Sjálfstæðisflokksins í Árborg hefur tekið formlega til starfa í kjölfar fyrsta bæjarstjórnarfundar sem fór fram 3. júní síðastliðinn.
Meirihlutinn kynnti leiðarljós sín fyrir komandi kjörtímabil ásamt nefndaskipan á fjölmiðlafundi í Hellisskógi í gærkvöldi. Meginstef D-listans er að auka hagsæld sveitarfélagsins, byggja upp öflugt atvinnulíf og létta undir og bæta daglegt líf íbúanna.
Embættisskipan verður á þann veg að Bragi Bjarnason heldur áfram sem bæjarstjóri, Sveinn Ægir Birgisson verður formaður bæjarráðs og formaður eigna- og veitunefndar og Kjartan Björnsson forseti bæjarstjórnar. Kjartan verður einnig formaður nýrrar menningarnefndar sem verður skipuð á næsta fundi bæjarstjórnar.
Aðrir formenn helstu fagnefnda sveitarfélagsins verða Linda Björk Hilmarsdóttir, sem verður formaður skipulagsnefndar og velferðarnefndar, Brynhildur Jónsdóttir, verður formaður fræðslu- og frístundanefndar og Þórhildur Ingvadóttir, formaður umhverfisnefndar og öldungaráðs.
„Við erum þakklát íbúum fyrir traustið og munum starfa áfram að heilindum fyrir alla íbúa í Sveitarfélaginu Árborg. Við höfum trú á góðri samvinnu innan bæjarstjórnar að þeim tækifærum sem eru fyrir Árborg á næstu árum,“ sagði Bragi Bjarnason, bæjarstjóri, á kynningunni í Hellisskógi í gærkvöldi.
Að sögn Braga er skýr framtíðarsýn forsenda þess að sveitarfélagið megi vaxa og dafna.
„Sjálfstæðisflokkurinn mun vinna að því að létta róðurinn og tryggja ábyrga fjármálastjórn sem skili sér í lægri álögum á íbúa og fyrirtæki. Stefnan er að byggja upp fjölbreytt atvinnulíf og sterka innviði í fjölskylduvænu samfélagi þar sem íbúar á öllum aldri geta sótt þjónustu og fengið störf við hæfi. Þá ætlum við að standa fyrir uppbyggingu útivistar- og frístundasvæða sem munu bæta lífsgæði okkar íbúa til lengri tíma,“ sagði Bragi og bætti við að hann og aðrir bæjarfulltrúar D-listans muni vinna þétt saman með öðrum bæjarfulltrúum að þeim verkefnum og tækifærum sem eru framundan í sveitarfélaginu.
