Cabin ehf hefur gengið frá kaupum á Hótel Laka við Kirkjubæjarklaustur. Kaupverðið er trúnaðarmál. Með kaupunum bætist öflugt og rótgróið hótel við rekstur félagsins sem rekur fyrir Hótel Cabin, Hótel Örk og Hótel Klett. Þá stendur yfir undirbúningur að opnun Moxy Reykjavík, sem áætlað er að opni árið 2028.
Hótel Laki er afar vel staðsett á Suðurlandi og hefur um árabil verið vinsælt hótel fyrir bæði innlenda og erlenda ferðamenn. Hótelið nýtur góðs orðspors fyrir vandaða þjónustu, notalegt umhverfi og einstaka nálægð við helstu náttúruperlur svæðisins. Þaðan er einstakt útsýni enda staðsetningin á milli jökla og eldfjalla.
„Við erum afar ánægð með að Hótel Laki bætist í hóp okkar hótela. Hótelið er frábær viðbót við reksturinn og fellur vel að þeirri framtíðarsýn okkar að byggja upp öflugt safn hótela á Íslandi, bæði á höfuðborgarsvæðinu og á landsbyggðinni,“ segir Jóhann Sigurðsson framkvæmdastjóri Cabin ehf.
Stolt að afhenda nýjum aðila keflið
„Við hjónin og fjölskyldan, sem höfum byggt upp þennan rekstur frá árinu 1973, erum afar stolt af því að geta afhent keflið nýjum aðila sem hyggst halda starfinu áfram af fagmennsku og metnaði“ segja Hörður Davíðsson og Salóme Ragnarsdóttir, stofnendur Hótel Laka.
Með kaupunum styrkir Cabin enn frekar stöðu sína á íslenskum hótelmarkaði og eykur viðveru sína á Suðurlandi, sem er eitt vinsælasta ferðamannasvæði landsins. Áhersla verður lögð á að byggja áfram á sterkum grunni Hótel Laka, viðhalda þeim gæðum sem þar hafa einkennt reksturinn og skapa frekari tækifæri til vaxtar.
Rekstur hótelsins mun halda áfram með óbreyttum hætti, en ráðist verður í nauðsynlegar endurbætur og jafnframt skoðaðir möguleikar á frekari uppbyggingu. Áfram verður lögð áhersla á gott samstarf við starfsfólk, viðskiptavini og nærsamfélagið.
Áætlað er að afhending eigi sér stað eigi síðar en 1. maí. Gert er ráð fyrir að viðskiptin taki gildi að uppfylltum fyrirvörum, þar á meðal samþykki samkeppnisyfirvalda. Ráðgjafar seljenda í viðskiptunum voru KPMG. Þá voru ráðgjafar kaupanda Civitas og LEX.
