Byssumaður handtekinn í Þorlákshöfn

Lögreglan á Selfossi rannsakar nú mál manns sem handtekinn var á heimili sínu í Þorlákshöfn á fimmta tímanum í nótt.

Maðurinn er grunaður um að hafa hleypt af skoti eða skotum á eða við heimili sitt en óljóst er um tilgang þess. Hann hafði einnig skorið eða skrámað sig með hníf, samkvæmt upplýsingum lögreglunnar.

Lögreglu barst tilkynning um manninn kl. 4.07 í nótt og tryggðu lögreglumenn frá Selfossi og sérsveitarmenn ríkislögreglustjóra vettvang.

Maðurinn, sem er á fertugs aldri, kom síðan sjálfviljugur út úr húsi sínu kl. 4.46 og gaf sig fram við sérsveitarmenn eftir að hafa rætt við sérþjálfaðan samningamann lögreglu í síma. Aðrir voru ekki í húsinu. Maðurinn var færður í fangageymslu og verður yfirheyrður síðar í dag.

Lögreglan segir ekki unnt að veita frekari upplýsingar um málið að svo stöddu.