Fyrsta skipið með stálbitum í Ölfusárbrú kom til Þorlákshafnar um páskana. Skipið sigldi frá Gdansk en stálbitarnir eru framleiddir í verksmiðjum Norvik í Póllandi.
Í þessari ferð kom um helmingur af þeim bitum sem notaðir verða í burðargrind nýju brúarinnar en þeir eru engin smásmíði, tveggja metra háir og um 20 metra langir, þyngstu einingarnar vega um 40 tonn.
Vinna við samsetningu er hafin á verkstað og þess vegna fjölgar starfsfólki á bökkum Ölfusár en nú eru það alls sextíu manns að störfum við brúarframkvæmdina.
Búið er að steypa undirstöður landstöpla Ölfusárbrúar og í Laugardælaeyju er lokið við fyllingu og steypu þrifalags og unnið við uppslátt og járnbendingu fyrir undirstöðu turnsins sem þar mun rísa.
Austan við Selfoss er unnið að byggingu vegbrúar sem reist verður yfir nýja hluta Hringvegarins. Uppsteypu stöpla brúarinnar lauk fyrir síðustu áramót og búið er að steypa brúardekkið.
Vestan Ölfusár er unnið við fergingar vegstæðisins í Hellismýri á um 700 m löngum kafla. Fargið er nú komið í um hálfs meters hæð yfir endanlegt vegyfirborð. Fargið þarf að standa fram á næsta ár.