Síðasta undirstaðan fyrir vindmyllurnar í Vaðölduveri var steypt föstudaginn 2. október síðstliðinn. Fjórtán vindmyllur hafa þegar verið reistar og áætlað er að reisa aðrar fjórtán árið 2027.
Fyrsta undirstaðan í Vaðölduveri var steypt 15. september 2025 og hefur vinna við undirstöðurnar því staðið yfir í rúmt ár, samhliða flutningum og uppsetningu vindmyllanna.
Nú er kapp lagt á að ljúka frágangi jarðvinnu áður en veturinn skellur á. Verkið er vel á undan áætlun, en áætlaður verktími er til september 2027.
Í tilefni áfangans var slegið upp veislu í mötuneytinu í Vaðölduveri þar sem boðið var upp á glæsilega köku frá Almari bakara. Kakan var nokkuð nákvæm eftirlíking af undirstöðu í mælikvarðanum 1:20.
Samkvæmt upplýsingum frá Ístaki, sem sér um steypuvinnuna, er gerð hverrar undirstöðu mikið nákvæmnisverk. Í hverri undirstöðu eru 80–90 tonn af bendistáli og um 450 rúmmetrar af steypu, sem samsvarar 50-60 steypubílsförmum sem dælt er í mótin í einni samfelldri lotu. Á þessu rúma ári hafa alls verið notaðir um 13.000 rúmmetrar af steypu og 2.300 tonn af bendistáli í verkinu. Til að setja það í samhengi samsvarar steypumagnið um 1.600 steypubílsförmum og nægir til að steypa um 100 einbýlishús.
