![Bílaröð Suðurlandsvegur Vík](https://www.sunnlenska.is/wp-content/uploads/2022/02/Bílaröd-Sudurlandsvegur-Vík-696x522.jpeg)
Búið er að opna Suðurlandsvegi að nýju á milli Hvolsvallar og Víkur en hann hefur verið lokaður að mestu leiti frá því í gærmorgun.
Mikil skaflamyndun var austan við Hvolsvöll og til að mynda var tveggja metra hár skafl yfir þjóðveginn við Hemlu í Vestur-Landeyjum. Um 50 bílar lentu í vandræðum á Sólheimasandi í gær og þurftu aðstoð björgunarsveita og þá var sömuleiðis ófært um Reynisfjall.
Þessa stundina er hálka eða hálkublettir á Suðurlandsvegi en annars er þæfingsfærð, hálka eða hálkublettir á flestum öðrum leiðum á Suðurlandi. Á morgun er svo von á næstu lægð og má búast við veglokunum á Suðurlandi þegar líður á daginn.
![](https://www.sunnlenska.is/wp-content/uploads/2022/02/Sudurlandsvegur-vid-Hemlu.jpeg)