Búið að upplýsa þjófnaðinn á Geysi

Rannsóknarlögreglumenn á höfuðborgarsvæðinu handtóku ungan mann á mánudag í tengslum við rannsókn á þjófnaði á fatnaði úr versluninni Geysi í Haukadal á sunnudag.

Við húsleit á dvalarstað mannsins fannst fatnaður sem rakinn var til verslunarinnar og við yfirheyrslu hjá rannsóknardeild lögreglunnar á Selfossi játaði maðurinn að hafa borið vörurnar út úr versluninni við annan mann. Sá var einnig handtekinn og viðurkenndi aðild.

Mennirnir fóru gagngert að Geysi til að auðgast með þessum hætti. Þeir gerðu sér nokkrar ferðir inn í verslunina til að bera út fatnað að verðmæti um 1,6 milljón króna. Talið er að allur fatnaðurinn hafi náðst til baka lítið eða óskemmdur en lögregla á eftir að fara yfir þann þátt málsins.

Mennirnir eru báðir frá Lettlandi og hafa dvalið hér á landi í tvö ár. Að lokinni rannsókn verður málið sent ákæruvaldi til meðferðar.

TENGDAR FRÉTTIR:
Klæddu sig upp og hlupu út