Búið að opna Landmannaleið

Búið er að opna fyrir umferð um Landmannaleið, F225. Það var gert í dag og þar með er formlega búið að opna ferðaþjónustuna við Landmannahelli.

Að sögn Engilberts Olgeirssonar, eins Hellismanna sem reka ferðaþjónustuna við Landmannahelli, hefur ekki verið opnað svona seint í áraraðir. „Tekjumissir Hellismanna er umtalsverður vegna þessa, en yfirleitt getum við opnað í kringum 20. júní, stundum fyrr,“ segir Engilbert.

Við Landmannahelli er svefnpokagisting í átta húsum fyrir samtals 92 gesti í einbreiðum og tvíbreiðum kojum. Húsin eru upphituð, með rennandi vatni, eldunaraðstöðu og klósetti. Einnig er svæði fyrir tjöld, fellihýsi og húsbíla, smáhýsi með hreinlætisaðstöðu, útigrill og veiðileyfasala.

Hálendiskort Vegagerðarinnar