Listi Samfylkingarinnar og félaga í Ölfusi hefur samið við Bryndísi Gunnlaugsdóttur, fyrrverandi forseta bæjarstjórnar Grindavíkur, um að verða bæjarstjóraefni framboðsins.
Frá þessu er greint í aðsendri grein frá fjórum efstu frambjóðendum listans á sunnlenska.is í dag.
Bryndís er 45 ára lögfræðingur og kennir sveitarstjórnarrétt og stjórnsýslu í tveimur háskólum. Hún hefur starfað hjá Sambandi íslenskra sveitarfélaga og KPMG.
Bryndís býr ásamt eiginmanni og dóttur í Hveragerði en ef hún verður ráðin bæjarstjóri Ölfuss mun hún flytja ásamt fjölskyldunni í Þorlákshöfn
„Við teljum að það sem einkenni Bryndísi sérstaklega sé að hún sameinar fagmennsku og mannlega nálgun. Hún skilur að góð stjórnsýsla snýst ekki aðeins um reglur, ferla og ákvarðanir, heldur líka um samskipti, virðingu og hæfni til að vinna með ólík sjónarmið,“ segir í greininni.