Brúnni yfir Eldvatn við Ása lokað

Í tilkynningu frá Almannavarnadeild ríkislögreglustjóra kemur fram að brúnni yfir Eldvatn við Ása hefur verið lokað, á meðan ástand þar er skoðað.

Í fréttum RÚV í morgun kom fram að rennsli í Skaftá við Sveinstind gæti verið allt að 3.000 rúmmetrar á sekúndu en mælirinn þar sýndi mest 2.000 rúmmetra á sekúndu. Mikið vatn rennur hins vegar framhjá mælisniðiðinu og sameinast svo aftur í ánni neðar.

„Þetta er alveg gríðarlegt flóð og miklu meira en við höfum kynnst áður og ég tel fulla ástæðu til að hafa varann á,“ segir Snorri Zóphaníasson, jarðfræðingur á vatnamælingasviði Veðurstofunnar, í samtali við RÚV.

Snorri segir að megnið af flóðinu fari niður Eldvatn hjá Ásum og gríðarlega mikið fari inn í hraunið. „Það mun fara þaðan um farveginn og fara út í Flögulón og síðan undir Kúðafljótsbrúnna. Ég hef mælt mikinn gröft frá stöplum hennar í hlaupi. Við höfum lóðað með stöplunum. Ég er nú ekki brúarverkfræðingur en ég veit þetta, við höfum dýptarmælt við stöplana og það hefur grafist mjög mikið frá þeim,“ segir Snorri.