Matvælastofnun barst nýverið tilkynning um að brúni hundamítillinn hafi greinst á hundi á Selfossi. Eigandinn fann mítilinn við burstun á feldi hundsins og fór í kjölfarið með hann til Dýralæknaþjónustu Suðurlands.
Þaðan var mítillinn sendur til greiningar á Tilraunastöð Háskóla Íslands í meinafræði að Keldum. Tegundagreining leiddi í ljós að um var að ræða brúna hundamítilinn.
Brúni hundamítillinn hefur aðeins greinst í örfá skipti hér á landi og er ekki talinn landlægur á Íslandi. Hann hefur áður fundist í hundi á Selfossi, í desember 2024, en Matvælastofnun vinnur að því að koma í veg fyrir að hann nái fótfestu hér á landi.
Í tilkynningu hvetur Matvælastofnun hunda- og kattaeigendur til að skoða húð og feld dýra sinna reglulega og hafa samband við dýralækni ef mítill finnst á hundi eða grunur vaknar um mítla. Ef brúni hundamítillinn greinist þarf að tilkynna það tafarlaust til Matvælastofnunar á mast@mast.is.
Brúni hundamítillinn nærist helst á hundum en getur lagst á önnur spendýr, svo sem nagdýr. Hann er eini mítillinn sem getur farið í gegnum allan lífsferilinn innanhúss og getur því fundist allt árið um kring. Brúni hundamítillinn getur borist með fólki og farangri frá löndum þar sem hann er landlægur, sérstaklega eftir snertingu við dýr eða umhverfi þeirra.