Brunavarnir Rangárvallasýslu semja við Trésmiðju Ingólfs

Á myndinni eru í aftari röð f.v. Valtýr Valtýsson, Guðmundur J. Gíslason, Anton Kári Halldórsson og Ágúst Sigurðsson. Í fremri röð f.v. Hjalti Tómasson og Ingólfur Rögnvaldsson. Ljósmynd/ry.is

Stjórn Brunavarna Rangárvallasýslu kom saman til fundar í gær og undirritaði verksamning við Ingólf Rögnvaldsson frá Trésmiðju Ingólfs ehf. um 2. áfanga við byggingu nýrrar slökkvistöðvar á Hellu.

Fyrirtæki Ingólfs átti lægsta tilboð í verkið samtals tæpar 32,6 milljónir króna en kostnaðaráætlun verksins hljóðaði uppá rúmar 38,3 milljónir. Umsjón og eftirlit með verkinu af hálfu verkkaupa verður í höndum Ólafs Rúnarssonar, aðstoðarmanns byggingarfulltrúa Rangárþings eystra og eldvarnaeftirlitsmanns Brunavarna Rangárvallasýslu bs.

Um er að ræða fullnaðarfrágang við framtíðar slökkvistöð Brunavarna Rangárvallasýslu á Hellu. Á neðri hæð hússins verður tækjasalur auk snyrtiaðstöðu en á þeirri efri verður starfsmannarými auk skrifstofuaðstöðu. Heildarverklok eru 15. maí næstkomandi.