Brunavarnir Rangárvallasýslu bs. fengu nýlega afhentan nýjan og glæsilegan slökkviliðsbíl. Bíllinn er gríðarlega vel tækjum búinn og eflir til muna öryggi og brunavarnir á svæðinu.
Brunavarnir Rangárvallasýslu kaupa bílinn eftir útboð af Fastus heilsu en bíllinn, sem er á Scania undirvagni, er með öflugu froðukerfi, dróna, reykköfunartækjum og 3.000 lítra vatnstanki. Þá er bíllinn einnig með öflugum monitor fyrir hitamyndavél sem er stýrt er með þráðlausri fjarstýringu. Bíllinn er smíðaður hjá Egenes í Flekkefjord í Noregi en allur búnaður í dælubílinn er frá Rosenbauer.
„Við hjá Fastus erum afar ánægð og stolt að afhenda þennan nýja dælubíl til Brunavarna Rangárvallasýslu. Við unnum útboðið í samstarfi við Egenes í Noregi sem smíðar þessa bíla og hafa gert með góðum árangri í 30 ár. Við seljum búnað til slökkviliða hér á landi, ekki einungis bifreiðar, heldur einnig hjálma, galla, dælur og fleira,“ segir Ágúst G. Valsson, sölufulltrúi hjá Fastus heilsu, í samtali við sunnlenska.is.
Brunavarnir Rangárvallsýslu eru í sameign Ásahrepps, Rangárþings ytra og Rangárþings eystra og sinna brunavörnum í allri sýslunni. Bíllinn er staðsettur í höfuðstöðvunum á Hellu og á dögunum var haldið opið hús þar sem öllum bauðst að koma við og kíkja á bílinn.
