Fimmtíu ökumenn voru kærðir fyrir of hraðan akstur í umdæmi lögreglunnar á Suðurlandi í síðustu viku.
Allir nema einn óku of hratt úti á þjóðvegunum en einn var tekinn fyrir að aka á 81 km/klst hraða innanbæjar á Selfossi.
Sá sem hraðast ók var á 150 km/klst hraða á Mýrdalssandi síðastliðinn miðvikudag. Annar ökumaður var kærður á svipuðum slóðum, fyrir að aka of hratt miðað við aðstæður, en hann brunaði framhjá lögreglubifreið þar sem hún stóð í vegkanti með forgangsljósin kveikt eftir að lögreglumenn höfðu stöðvað rútu sem þar var á ferð.
Einn þeirra sem ók of hratt var með kerru í eftirdragi en kerran var ljóslaus, óskráð og engin bretti yfir dekkjunum.