Á morgun, föstudaginn 9. september, munu vegamálastjóri og innanríkisráðherra standa fyrir formlegri vígslu á Hvítárbrú og verður klippt á borða klukkan 15:00.
Í tilefni af þessum merkisviðburði ætla heimamenn beggja vegna brúarinnar að gera sér glaðan dag og hittast. Íbúar í Hrunamannahreppi og Bláskógabyggð eru hvattir til að ganga á móti hver öðrum og mætast á brúnni. Kvenfélagskonur munu klæðast þjóðbúningum og eru allar konur sem þá eiga hvattar til að mæta uppábúnar. Félagar í Karlakór Hreppamanna taka lagið á brúnni að lokinni vígslu.
Í tilefni dagsins verður boðið upp á „Brúarskokk“ fyrir börn. Hlaupið verður ræst á tveimur stöðum í einu kl. 14:15, við afleggjarann við Galtalæk og við hringtorgið á Flúðum. Lengd hlaupsins er 2,1 km. en endað verður á miðri brú. Allir sem áhuga hafa á að taka þátt í hlaupinu þurfa að mæta kl 14:00 við afleggjarann á Galtalæk og við hringtorgið á Flúðum.
Sveitungar eru hvattir til að taka þátt og koma að brúnni gangandi, skokkandi, ríðandi eða jafnvel á gömlum bílum. Á eftir er upplagt að heimsækja vini í nágrannasveit eða bregða sér á næsta veitingastað þar sem án efa verða brúartilboð í tilefni dagsins.