Brottvikning Almars ólögmæt

Hreppsnefnd Flóahrepps mátti ekki víkja Almari Sigurðssyni úr umhverfis­nefnd sveitarfélagsins líkt og gert var þann 17. mars sl.

Þetta er niðurstaða samgönguráðu­neytisins sem fer með málefni sveitarfélaga. Brottvikningin var gerð á þeim forsendum að Almar hefði lýst yfir framboði gegn sitjandi sveitarstjórn. Almar fór fram á það við ráðuneytið að það úrskurðaði um lögmæti ákvörðunar sveitarstjórnar.

Í úrskurði ráðuneytisins kemur fram að brottvikningin hafi verið ólögmæt og að jafnframt hafi málsmeðferð sveitarstjórnar við kjör nýs fulltrúa í umhverfisnefndina ekki verið í samræmi við lög og skipan nefndarinnar sem starfaði frá miðjum mars til 14. júní sl. Hefði verið full samstaða í sveitarstjórn um að breyta um fulltrúa í nefndinni hefði ekki þurft að kjósa í hana á nýjan leik en einn fulltrúi í sveitarstjórn setti sig upp á móti brottvikningunni.

Ráðuneytið féllst ekki á skýringar sveitarstjórnar sem hún bar fyrir sig í greinargerð að Almar hafi nýtt fundi umhverfis­nefndar til að gagnrýna meirihluta sveitarstjórnar og þannig unnið gegn meirihlutanum. Slík röksemdafærsla hefði með réttu átt að koma fram við ákvörðun um brottvikningu. Ein­ungis var bókað að Almari væri vikið úr nefndinni vegna fréttar um nýtt framboð í Flóahreppi, en fram hafði komið í Fréttablaðinu að til stæði að bjóða fram nýjan framboðslista í kosningunum þá um vorið og að Almar væri einn forsvarsmanna framboðsins.

Í samtali við Sunnlenska sagði Almar niðurstöðuna sýna hvernig stjórnsýslan var í Flóahreppi á síðasta kjörtímabili. Úrskurðurinn væri áminning til sveitarstjórnar­manna að virða lög og reglur sem þeir eigi að starfa eftir. „Mér fannst sem væri verið að sparka í mig og ég var ekki tilbúinn að láta það yfir mig ganga,“ sagði Almar.

Aðalsteinn Sveinsson, oddviti Flóahrepps, sagði úrskurð ráðuneyt­isins koma sér á óvart en vildi ekki tjá sig frekar um málið þegar Sunnlenska hafði samband við hann.