Það var gífurlega góð stemning á hinu árlega bleika konukvöldi sem haldið var í versluninni Lindex á Selfoss í gærkvöldi.
Þetta er í fimmta sinn sem bleika konukvöldið er haldið í Lindex á Selfossi og þykir mörgum ómissandi að mæta og eiga ánægjulega kvöldstund með vinkonunum.
Boðið var upp á léttar veitingar og 20% afsláttur var af öllum vörum í versluninni.
DJ Dóra Júlía sá um að skapa réttu stemninguna með skemmtilegri tónlist og gjafapokar voru fyrir fyrstu viðskiptavinina. Einnig gafst viðskiptavinum kostur á að snúa lukkuhjólinu og voru sumir heppnari en aðrir.
Eins og alltaf þegar konukvöld eru í Lindex þá voru ýmis fyrirtæki og einstaklingar með kynningu á sínum vörum. Eyrún handverkskona kynnti íslenskt keramik frá Artrún, auk þess að vera með kynningu á spennandi námskeiði fyrir konur. Steinunn Birna frá Horninu kynnti leirnámskeið fyrir áhugasama og var einnig með leirmuni til sölu. Daley kerti var með kynningu en ilmkertin frá þeim eru eiturefnalaus auk þess að vera einstaklega falleg. Lena verslun var með kynningu á sínum vörum en K18 hárvörurnar frá þeim hafa algjörlega slegið í gegn síðan þær komu á markað. Kjötbúrið var svo með smakk af dýrindis kræsingum og passaði upp á að enginn færi svangur heim.
Vert er að geta að Krabbameinsfélagið fékk 10% af allri sölu gærdagsins.
