Bragi Bjarnason, deildarstjóri frístunda- og menningardeildar Sveitarfélagsins Árborgar, hefur ákveðið að gefa kost á sér í 1. sætið á lista Sjálfstæðisflokksins í Árborg í komandi sveitarstjórnarkosningum.
Prófkjör Sjálfstæðisflokksins í Árborg mun fara fram þann 19. mars næstkomandi.
„Það hefur blundað í mér í nokkurn tíma að taka skrefið inn á hið pólitíska svið og vil ég gera það af fullum krafti og einlægni. Ég sækist eftir oddvitasæti Sjálfstæðisflokksins þar sem ég tel að kraftar mínir nýtist til að leiða samstilltan hóp fólks til góðra verka fyrir samfélagið. Öflugt lið þar sem allir hafa rödd og stuðning til að ljúka verkefnum og ná settum markmiðum. Þar tel ég að reynsla mín úr daglegum störfum og félagsmálum nýtist vel,“ segir Bragi í framboðstilkynningu sinni.
Bragi er menntaður íþróttafræðingur, með MBA gráðu frá Háskóla Íslands og hefur starfað sem stjórnandi hjá Sveitarfélaginu Árborg undanfarin fjórtán ár.
„Á þessum tíma hef ég unnið að íþrótta-, frístunda-, forvarna-, viðburða-, markaðs- og ferðaþjónustumálum fyrir sveitarfélagið og vil nýta þá miklu þekkingu sem ég hef til áframhaldandi vinnu fyrir samfélagið á breiðari vettvangi. Ég legg áherslu á ábyrgan rekstur sveitarfélagsins þar sem öflug fjármálastjórn og forgangsröðun skapar tækifæri og forsendur til að veita okkur íbúum betri þjónustu til framtíðar. Samhliða þeirri íbúafjölgun sem hefur verið í Árborg undanfarin ár þarf að fjölga atvinnutækifærum svo íbúar hafi fleiri valmöguleika um störf í nærsamfélaginu. Þar vil ég leggja mín lóð á vogarskálarnar svo samfélagið okkar geti haldið áfram að vaxa en á þeim forsendum að innviðir, líkt og leik- og grunnskólar, hitaveita og önnur mikilvæg þjónustu sé tilbúin undir slíkt,“ segir Bragi.
„Tekjur hafa ekki fylgt þeim verkefnum sem færð hafa verið til sveitarfélaga frá hinu opinbera og vil ég vera sterk rödd Sveitarfélagsins Árborgar í samstarfi við önnur sveitarfélög um að hið opinbera leiðrétti kostnaðarþátttöku sína í verkefnum líkt og málaflokki fatlaðra og leik- og grunnskóla. Það er hagsmunamál sem snertir okkur öll að halda góðri þjónustu í nærsamfélaginu. Sem foreldri þriggja barna hef ég kynnst því öfluga starfi sem er í leik- og grunnskólum og frístundastarfinu í Árborg. Það er að mínu mati frábært að ala upp börn í Sveitarfélaginu Árborg og vil ég leggja allan minn metnað í að það verði áfram eftirsóknarvert að búa í sveitarfélaginu,“ segir Bragi ennfremur.
Hægt er að fylgjast með prófkjörsbaráttu Braga á heimasíðu hans, Facebook og Instagram.