Bíll sem ekið var um Suðurlandsveg við Blautukvísl á Mýrdalssandi síðastliðinn laugardag mældist á 172 km/klst hraða en þar er leyfður hámarkshraði 90 km/klst.
Ökumaðurinn, sem var erlendur ferðamaður, var sektaður um 250 þúsund krónur, sviptur ökurétti í þrjá mánuði og fær að auki þrjá punkta í ökuferilsskrá.
Lögreglan á Suðurlandi stöðvaði tíu aðra ökumenn í síðustu viku vegna hraðaksturs. Þrír af þeim voru á hraðferð við Jökulsárlón.