Börn hjálpa börnum – árlegt söfnunarátak ABC barnahjálpar í samstarfi við grunnskóla landsins verður sett af stað í 17. skipti í dag í Ráðhúsi Reykjavíkur.
Jón Gnarr borgarstjóri hefur söfnunina með hvatningarræðu og framlögum í fyrstu baukana er hann tekur á móti 46 nemendum úr 5. bekk Langholtsskóla. Nemendurnir eru fulltrúar þúsunda barna sem ganga í hús um land allt og safna framlögum í merkta ABC bauka næstu þrjár vikurnar.
Að þessu sinni verður safnað fyrir nýrri heimavist stúlkna við heimavistarskólann í Machike í Pakistan. Utanríkisráðuneyti Íslands hefur lagt 17,7 milljónir til byggingarinnar og er markmiðið að safna fyrir mótframlagi ABC og ljúka byggingunni með þessari söfnun.
Ef meira safnast verður mismunurinn notaður til að ljúka nýrri skólabyggingu á sama stað sem byrjað er að nota fyrir skólastarf þrátt fyrir að hún sé rétt fokheld.
Um 250 stúlkur og jafnmargir drengir stunda nám í heimavistarskólanum í Machike en alls starfrækir ABC barnahjálp nú 13 skóla í Pakistan með um 3000 nemendur. Skólarnir hafa allir verið byggðir eða settir á fót fyrir íslenskt fé og eiga margir nemendur þeirra íslenska stuðningsforeldra.
Hægt er að gerast stuðningsforeldri barns í Pakistan á heimasíðunni www.abc.is en þar má finna börn sem enn vantar stuðningsaðila.
Einnig er hægt að leggja söfnuninni lið með því að leggja inn á söfnunarreikninginn nr: 515-14-110000, kt.690688-1589.