Að mati norska jarðgangasérfræðingsins Eivinds Grøv eru borkjarnar á því dýpi sem Eyjagöngin munu væntanlega liggja mun betri en hann hafði búist við. Hann segir niðurstöðurnar lofa mjög góðu um framhaldið. Grøv skoðaði kjarnana úr rannsóknarholum á Heimaey og í Landeyjasandi í heimsókn sinni til Íslands á dögunum.
Holan á Heimaey náði 234 metra dýpi og holan í Landeyjasandi 291,5 metrum. Í báðum holum reyndust kjarnarnir mjög góðir frá 160 metra dýpi og neðar. Eyjagöngin munu að stærstum hluta liggja á um 220 metra dýpi.
„Kjarnarnir eru mun betri en ég hafði búist við og það lofar góðu. Þegar niðurstöður hafsbotnsrannsóknanna liggja fyrir fáum við heildstæðari mynd af berginu á allri gangaleiðinni,“ segir Eivind Grøv.
Grøv er einn helsti ráðgjafi Eyjaganga við undirbúning verkefnisins. Hann var yfirvísindamaður hjá norsku rannsóknastofnuninni SINTEF og prófessor við norska tækni- og vísindaháskólann NTNU. Hann er einnig fyrrverandi varaforseti Alþjóðasamtaka um jarðgangagerð (ITA) og hefur veitt ráðgjöf við verkefni í yfir 20 löndum.
Íslenskar orkurannsóknir (ÍSOR) framkvæmdu hafsbotnsrannsóknir á gangaleiðinni í sumar. Þá var notaður svokallaður sparker-endurkastmælir til að kortleggja efstu jarðlögin undir hafsbotni. Eyjagöng vinna nú með ÍSOR að úrvinnslu gagnanna.
Þegar niðurstöður rannsóknanna liggja fyrir verða unnin tvö sjálfstæð fýsileikamöt á verkefninu, annað af innlendum sérfræðingum og hitt af norskum. Mötin munu byggja á niðurstöðum hafsbotnsrannsóknanna og greiningu borkjarnanna.
„Það skiptir okkur miklu máli að einn reyndasti jarðgangasérfræðingur Noregs hafi skoðað kjarnana sjálfur og að mat hans sé svo jákvætt. Tvö sjálfstæð fýsileikamöt, unnin af innlendum og norskum sérfræðingum, munu leggja traustan grunn að ákvörðunum um næstu skref,“ segir Haraldur Pálsson, framkvæmdastjóri Eyjaganga ehf.
