Borgarverk ehf bauð lægst í endurgerð Seljavegs og Tunguvegs á Selfossi, sem vinna á að á þessu ári.
Tilboð Borgarverks hljóðaði upp á 158,4 milljónir króna og er 95,9% af áætluðum verktakakostnaði Sveitarfélagsins Árborgar, sem er 165 milljónir króna. Árborg hefur samið við Borgarverk um verkið og var verksamningurinn undirritaður síðastliðinn miðvikudag.
Fjórir aðrir verktakar buðu í verkið. Gröfutækni bauð 164,1 milljón króna, Afrétting og heflun ehf 173,5 milljónir, Óskatak 186,2 milljónir og Snilldarverk 218,8 milljónir króna.
Verkið felur í sér endurgerð á Seljavegi og Tunguvegi en endurnýja á allar lagnir í götunni og ljósastaura. Að því loknu verða gata og gangstéttir malbikaðar, steyptir kantsteinar, hellulagðar hraðahindranir og gerðar niðurtektir með doppuhellum og leiðarlínuhellum fyrir gangandi umferð. Að lokum skal setja upp umferðarmerki og massa umferðarmerkingar.
Samhliða þessu verki munu HS veitur leggja nýjar raflagnir í göturnar.