Vegagerðin opnaði í dag tilboð í nýbyggingu Búðafossvegar, milli Þjórsárdalsvegar og Landvegar með nýrri brú yfir Þjórsá.
Tilboð Borgarverks hljóðaði upp á rúma 2,5 milljarða króna og var eina tilboðið sem var undir áætluðum verktakakostnaði Vegagerðarinnar. Áætlunin gerði fráð fyrir að verkið kostaði 2,9 milljarða króna og er tilboð Borgarverks 87,1 prósent af þeirri tölu.
Fjögur önnur tilboð bárust í verkið. ÞG verktakar buðu tæpan 3,1 milljarða króna og litlu hærra var tilboð PK verk. Eykt/Fossvélar/Suðurverk buðu rúma 3,2 milljarða króna og Ístak tæplega 3,6 milljarða króna.
Um er að ræða 7,4 km veg á milli Þjórsárdalsvegar í Skeiða- og Gnúpverjahreppi og Landvegi í Rangárþingi ytra. Innifalið í verkinu er gerð hringtorgs á gatnamótum Þjórsárdalsvegar og Búðafossvegar auk tengivega og nýja 204 metra langa brú yfir Þjórsá. Brúin verður staðsett norðaustan við Búðafoss. Einnig eru inni í verkinu tvenn stálklædd reiðgöng, ræsi og búfjárgöng, girðingar, ristarhlið, ljósastaurar og annar vegbúnaður.
Samkvæmt upphaflegum áætlunum er stefnt að því að framkvæmdum verði lokið á árinu 2029.