Borgaði sig að stoppa á Selfossi

Það voru hjón á besta aldri sem gáfu sig fram til Íslenskrar getspár í morgun með vinningsmiða í Víkingalottóinu uppá rúmar 98 milljónir.

Þau áttu leið um Selfoss þegar þau komu við á Snælandi þar sem heimilisfrúin týndi síðasta klinkið úr veskinu sínu fyrir 10 raða sjálfvalsmiða. Aldrei þessu vant heyrðu þau svo útdráttinn í útvarpinu í bílnum en vanalega láta þau athuga miðana sína á sölustöðum oft mörgum vikum eftir útdrætti. Þeim varð því strax ljóst að þau væru með 6 réttar tölur.

Hjónin eiga stóra fjölskyldu og tóku það fram að þessi vinningur ætti eftir að koma að góðum notum. Nú geta t.d. draumar um framhaldsmenntun barnanna ræst ásamt ýmsum öðrum góðum hlutum.

Fjölskyldan ætlar að taka þessu með ró og yfirvegun og ráðstafa peningunum vel og nýta sér fjármálaráðgjöf sem Íslensk getspá býður uppá.