Á morgun, föstudag, byrja Veitur að bora nýja heitavatnsholu í Hveragarðinum í Hveragerði við varmastöðina Bláskóga.
Holan verður nýtt í hitaveituna í Hveragerði, en í Hveragarðinum er nú þegar ein borhola sem nýtist vel. Áætlað er að holan verði tilbúin til nýtingar á næsta ári.
Varmá vöktuð með dróna
Veitur munu vakta Varmá á meðan borun stendur, enda mun umfram vatn renna í ánna á meðan framkvæmd stendur. Í tilkynningu frá Veitum segir að lífríki í og við ána eigi ekki að vera ógnað með framkvæmdinni, en Veitur vilji hafa varann á og vakta svæðið samt sem áður. Eftirlitið með ánni verður bæði á jörðu niðri við árbakkann og úr lofti með dróna. Dróninn sér svæðið næst ánni og árbakkanum, en hvorki garða og hús né gesti í sundlauginni.
Bráðabirgðalagnir fyrir vatn úr Varmá sem er notað við borunina liggja ofanjarðar að svæðinu en þær verða fjarlægðar þegar borun lýkur og gengið frá öllu yfirborði.
Borholur í Hveragerði sérstakar að mörgu leyti
Núverandi borhola, HS-08, hefur verið nýtt lengi en fyrstu árin var hún eingöngu nýtt í gufuveitu. Hún annar núverandi eftirspurn hitaveitunnar, en það þarf reglulega að takmarka notkun á gufuveitu yfir köldustu mánuðina.
Borholur hitaveitu í Hveragerði eru sérstakar að mörgu leyti, ekki hvað síst vegna hás hita, en þær eru 170°C sem er mjög heitt. Á lághitasvæðum eru borholur yfirleitt á bilinu 60-90°C svo munurinn er mikill.
Hitaveitan í Hveragerði er hringrásarkerfi þar sem varmaskiptar nota heita vatnið frá borholunni til að endurhita volgt vatn sem kemur til baka frá hitakerfum húsa. Þannig er vatnið endurnýtt og hitað upp að nýju, en alla jafna er það um 35-40°c þegar það kemur aftur inn í varmastöðina við Bláskóga.