Nú standa yfir breytingar á verslun Bónus Selfossi en eftir þær mun verslunin stækka um 350 fermetra.
Bónus við Larsenstræti 5 lokað tímabundið síðastliðinn mánudag og mun verslunin opna aftur næstkomandi laugardag, þann 30. maí klukkan 9.
Framkvæmdir við stækkun húsnæðisins hófust síðastliðið haust og hafa þær gengið vel.
„Við erum að gera spennandi breytingar á versluninni, hún er að stækka og fá góða andlitslyftingu á sama tíma,“ segir Björgvin Víkingsson, framkvæmdastjóri Bónus, í samtali við sunnlenska.is.
„Verslunin á Selfossi hefur verið mjög vel sótt síðustu ár og hefur oft verið erfitt að fóta sig í henni yfir sumartímann, þá sérstaklega eftir mikla aukningu á ferðamönnum. Breytingin mun hafa jákvæð áhrif fyrir viðskiptavini fyrst og fremst með bættu flæði, breiðari inngangi, sýnilegri tilboðum og bættu vöruúrvali. Þá munu bæði grænmetiskælir og ferskvörukælir koma til með að stækka,“ segir Björgvin ennfremur.
