Sveitarstjórn Hrunamannahrepps ætlar að boða rekstraraðila lágvöruverslana til viðræðna um uppbyggingu á lágvöruverslun í sveitarfélaginu.
Í júní fór af stað undirskriftarsöfnun í hreppnum þar sem skorað var á rekstraraðila lágvöruverðsverslana að opna verslun í hreppnum. Áskorunin og undirskriftarlistinn voru kynnt á síðasta fundi sveitarstjórnar en alls skrifuðu 652 einstaklingar undir listann.
Í bókun sveitarstjórnar kemur fram að hún taki heilshugar undir áskorunina og taki málið alvarlega. Sveitarstjórn mun koma áskoruninni á framfæri auk þess að boða rekstraraðila lágvöruverslana til viðræðna.
„Að geta verslað í heimabyggð vörur á viðráðanlegu verði er hluti af grunnþjónustu sem skiptir miklu máli í almennum lífskjörum íbúa í sveitarfélaginu en hátt vöruverð á svæðinu kemur mest niður á þeim sem hafa ekki kost á að fara annað til að versla. Það er líka nauðsynlegt að okkar fjölmörgu gestir hafi kost á því að versla á viðráðanlegu verði. Einnig má geta þess að það að geta fækkað ferðum í næstu lágvöruverslun sem staðsett er á Selfossi og myndi leggja lóð á vogarskálarnar í að minnka kolefnisútblástur,“ segir í bókun sveitarstjórnar Hrunamannahrepps.