Skrifað hefur verið undir samkomulag um samruna Bláa Lónsins hf. og Arctic Adventures hf. Samkomulagið er gert með fyrirvara um áreiðanleikakönnun á báðum félögunum, samþykki Samkeppniseftirlitsins og samþykki hluthafafunda félaganna.
Bláa Lónið er móðurfélag öflugra og leiðandi fyrirtækja á sviði upplifunarferðaþjónustu, heilsu og vellíðunar á meðan Arctic Adventures sérhæfir sig á sviði ævintýra- og afþreyingarferðaþjónustu á Íslandi og rekur meðal annars vinsæla áfangastaði á borð við Fjaðrárgljúfur, Kerið og Raufarhólshelli.
Með sameiningunni verður til kraftmikið ferðaþjónustufyrirtæki á breiðum grunni sem verður leiðandi afl í rekstri og þróun íslenskrar upplifunar- og vellíðunarferðamennsku.
„Það er markmið okkar að Bláa Lónið leiði áfram uppbyggingu og fjárfestingar sem staðsetja Ísland sem einn af fremstu upplifunar og vellíðunar áfangastöðum heims. Kaup á Arctic Adventures er mikilvægt skref í þá átt. Upplifun og vellíðan er bæði okkar sérstaða og styrkleiki,“ segir Sigríður Margrét Oddsdóttir, forstjóri Bláa Lónsins.
„Þetta eru tímamót fyrir Arctic Adventures. Bláa Lónið hefur byggt upp eitt sterkasta vörumerki Íslands á alþjóðavísu og með sameiginlegum styrk félaganna skapast einstakt tækifæri til áframhaldandi vaxtar og þróunar. Við hlökkum til að taka þátt í þeirri vegferð og styrkja enn frekar stöðu Íslands sem áfangastaðar í harðri samkeppni á alþjóðlegum ferðaþjónustumarkaði,“ segir Ásgeir Baldurs, forstjóri Arctic Adventures.
Samanlagðar tekjur félaganna voru um 34,3 milljarðar króna á árinu 2025 og samanlagður fjöldi stöðugilda um 1.120 talsins. Heildarfjöldi stöðugilda hjá Bláa Lóninu er 780 og hjá Arctic Adventures 340.
Fyrirtækjaráðgjöf Landsbankans er ráðgjafi kaupanda og ARMA Advisory er ráðgjafi seljanda í viðskiptunum. Bláa Lónið hefur nú hafið formlegan undirbúning að skráningu á íslenskan hlutabréfamarkað. Landsbankinn og Fossar fjárfestingarbanki eru umsjónaraðilar útboðsins.