Bjarki Freyr Kjötmeistari Íslands 2020

Hópmynd af fagmönnum SS, sem er að sjálfsögðu samsett vegna COVID-19. Bjarki Freyr er þriðji frá hægri. Ljósmynd/Aðsend

Fagkeppni Meistarafélags kjötiðnaðarmanna var haldin í mars. Kjötiðnaðarmenn sendu inn vörur sínar sem voru dæmdar og í ljósi aðstæðna í samfélaginu vegna COVID-19 fengu þeir verðlaunin send heim án þess að komið væri saman.

Í frétt frá SS segir að það hafi verið mjög ánægjulegt að sjá hversu fagmenn Sláturfélags Suðurlands uppskáru sérlega vel í keppninni og titillinn Kjötmeistari Íslands féll í skaut Bjarka Frey Sigurjónssyni, kjöt­iðnaðarmeistara hjá SS á Hvolsvelli, sem var stigahæstur allra með 243 stig. Fast á hæla honum kom svo Steinar Þórarinsson einnig frá Sláturfélaginu með 241 stig.

Pylsur hafa notið vaxandi vinsælda síðustu ár og það var því gaman að Ostapylsan frá SS skyldi vera valin Besta matarpylsan 2020.

Frá SS fengu þessir kjötiðnaðarmenn verðlaun:

Benedikt Benediktsson
Besta varan úr svínakjöti: Rauðvínssalamí

Jónas Pálmar Björnsson
Besta varan úr folalda- og hrossakjöti: Fjalla-Cayen-grafið hrossafillé
og besta varan úr nautakjöti sem og í flokknum sælkeravörur:
Grafið nautafillé með lakkrískeim.

Oddur Árnason
Lambaorðan, besta varan úr lambakjöti: Tindfjallahangikjet

Steinar Þórarinsson
Besta varan í elduðum kjötvörum: Sviðasulta

Jón Sigurðsson
Besta varan í flokknum soðnar pylsur: Piparostapylsur með sveppum