Um síðustu mánaðamót lét Árni Bragason af störfum sínum sem landgræðslustjóri vegna aldurs. Við starfi hans tekur Birkir Snær Fannarsson en Svandís Svavarsdóttir, matvælaráðherra, hefur sett hann í embætti til áramóta.
Birkir, sem er frá Hellu, er lögfræðingur stofnunarinnar og hefur verið staðgengill landgræðslustjóra frá 1. desember síðastliðnum. Hann verður væntanlega síðasti landgræðslustjórinn í sögu stofnunarinnar en um næstu áramót munu Landgræðslan og Skógræktin sameinast í nýrri stofnun sem nefnist Land og skógur.
Í tilkynningu frá Landgræðslunni er Árna þakkað frábært starf í þágu stofnunarinnar á tímum þar sem umfang og fjöldi verkefna hefur aukist ört. Landgræðslan hefur, undir stjórn Árna, unnið að fjölmörgum landgræðslutengdum verkefnum og árangur starfsins víða með besta móti.