Eldur kom upp í lítilli sendibifreið á Eyrarbakka á fimmta tímanum í dag. Enginn slasaðist en bifreiðin er gjörónýt.
Neyðarlínan fékk tilkynningu um alelda bifreið við Háeyrarvelli á Eyrarbakka og höfðu Brunavarnir Árnessýslu töluvert viðbragð vegna eldsins en að sögn Péturs Péturssonar, slökkviliðsstjóra, var í upphafi talið að hús sem bíllinn stóð uppvið væri í hættu en svo reyndist ekki vera.
Hins vegar var annar bíll í hættu en slökkviliðsmönnum tókst með snarræði að forða honum undan eldinum og urðu aðeins smávægilegar skemmdir á þeim bíl.
Greiðlega gekk að slökkva eldinn. Eldsupptök eru ókunn en bifreiðin var mannlaus þegar eldurinn kom upp.
