Talsverður viðbúnaður var vegna umferðarslyss í Kömbunum laust eftir klukkan fimm í dag þegar ökumaður bifhjóls missti stjórn á hjóli sínu og ók útaf.
Tveir voru á hjólinu og voru þeir báðir fluttir á sjúkrahús til Reykjavíkur. Samkvæmt upplýsingum frá lögreglunni á Suðurlandi eru meiðsli þeirra talin minniháttar.
Hjólið sjálft er stórskemmt en ökumaðurinn var á vesturleið og missti hjólið útaf í miðjum Kömbunum.
Lögreglan á Suðurlandi rannsakar tildrög slyssins.
Annir voru hjá viðbragðsaðilum í dag en þyrla Landhelgisgæslunnar sótti slasaðan ferðamann að Geysi um miðjan dag. Hann mun ekki vera alvarlega slasaður.